སྤྱི་ཚེས་༢༣/༡༡/༢༠༢༠ ལུ་ རྫོང་ཁ་གོང་འཕེལ་ལྷན་ཚོགས་དང་ ཀྲོང་གསར་སྟག་རྩེ་ལུ་ཡོད་པའི་སྐད་ཡིག་དང་ལམ་སྲོལ་མཐོ་རིམ་སློབ་གྲྭ་གཉིས་ཀྱི་བར་ན་ ཁག་འབག་གི་གན་རྒྱ་གུར་མཚན་རྟགས་བཀོད་ཡོདཔ་ཨིན། འདི་ཡང་ ལོ་ལྔ་འཆར་གཞི་༡༢ པའི་དམིགས་བསལ་ལས་འགུལ་ ཌི་ཇི་ཊཱལ་འབྲུག་ཡུལ་གྱི་འོག་ལུ་ རྫོང་ཁ་གོང་འཕེལ་ལྷན་ཚོགས་ཀྱིས་ ཨིང་སྐད་དང་རྫོང་ཁའི་བར་ན་ གློག་ཐོག་སྐད་སྒྱུར་རིམ་ལུགས་ཅིག་བཟོ་ནི་ཨིན་མི་ལུ་ དགོས་མཁོ་ཆེ་བའི་ཨིང་སྐད་ཀྱི་རྗོད་ཚིག་ ༡༥༠,༠༠༠ དེ་ཅིག་ སྐད་ཡིག་དང་ལམ་སྲོལ་མཐོ་རིམ་སློབ་གྲྭ་གིས་ རྩིས་ལོ་༢༠༢༠-༢༡ ནང་ རྫོང་ཁའི་ནང་སྐད་སྒྱུར་འབད་ནིའི་དོན་ལུ་ཨིན།